بقلم الشاعر هلال البعيني
يا ابني أنا
شو بخبرك بالأمس
الإنسان كان بعالم الظلمه
حتى وقت
تشرق عليه الشمس
هونيك
يبقى بعتمة الكلمه
للنار كان يشوفها باللمس
ونار الجهل
عم تحرقو بعلمي
إلّا ومثل صوت النعس
والهمس
صفّى يغل ببحرنا العلمي
بلش غرف
من بيدر التفكير
يعطي حِكِم للموقف وللظرف
يعرف
شو يعني ريشة التصوير
للحَبْ معول والقلم للحرف
يعني
مشي عا سكة التحرير
عا نور شمعه
من النحو والصرف
هون ابتدى يستيقظ الإنسان
راح
وبجنحين الوفا يعلي
فتش عا مطرح ما الأمل
سهران
ومطرح العتمه نور متجلي
طالع كتاب السهل
والبستان
يجمع قصايد حُب
بالسله
طالع كتاب العز والوجدان
حُب الوطن من جرتو
يملي
طالع كتاب الدين
والإيمان
تاشاف الله وبلش يصلي
يعني انتبه
يا ابني شو رح قلك
يمكن يخونك بالعتم ظلك
لكن كتابك
ها غذا للروح
أكثر وفا من خَيّك
وخِلّك
كلما فتحتو
ولو كنت مجروح
بيبلسمك والناس بتجلّك
بتدخل عا عالم لا عتم
لا جروح
وبيفيض منو بجرة المسموح
نور العا درب الرب بيدلك
الشاعر هلال البعيني
- التراث الروحي و علاقته بالعبور - مارس 26, 2026
- بين منقوشةٍ و كتاب…ولد أديبٌ من جوع آخر - مارس 25, 2026
- نافذة الأمل … والحنين إلى علما الشعب - مارس 14, 2026