بقلم الشاعر هلال البعيني
مبارح…
كنت معزوم عا عرس الدني
وكانوا
اللي مثلي كتار شبّان وبنات
رحت لمحل وجوه
فرحه ومحزني
نقي وجه بيليق فيي
عن ثبات
هونيك…
وجه عبوس مَنّو معدني
مثل اللي قلّو ربنا
قرشين هات
هيدا بيظل مغلف بحزن السنه
لا في حياة
ولا بيعرف تضحيات
وفي وجه قِجّه لليأس
للشيطني
خلف البراءة
شو مخبي سيئات
بيلبس قناع المسكنه
والولدني
تاتعلق ومن خنجرو مالك نجاة
ووجه الأنا
بنظرة غرورو معتني
مثل اللي من ذات السما
مسكوب ذات
بتحس أنو ما حدا مثلو جني
ولما خلق هوي
إله الكون مات
وفي وجه
مرجة ربيع ملوني
من ضحكتو
بيستخرجوا سكر نبات
فيه الحياة
وطبع للقلب الهني
بيطعم رغيف ولو وفا عطيتو فُتات
هودي عا ذات الواجهة
وشو هيني
إنك تنقي شو بتهوى من صفات
وما زال ما في وجه
إلا وما فني
لكن بقي من الزرع
شو تارك نبات
من هيك عن تعليقة النور السني
تركت الوجوه الميته
وشلت الوجه
يللي بيردني بعد موتي للحياة
الشاعر هلال البعيني
- أطول جملة في “البؤساء” للكاتب ڤيكتور هيجو - ديسمبر 23, 2025
- حوار مع الشاعرة رانيا مرعي - ديسمبر 23, 2025
- اللغة بين قلق الأكاديميين و هشاشة المستهلكين - ديسمبر 14, 2025