بقلم أليس شوفاني
لما بيسكت الحوار بيهرب الحب،وبيصر الحكي كلمات على الشاشة.
وبتروح الغمزة ولمسة الأيد للخد. وبتصير الوردة ترقص على الشاشة.ما فينا نتمتع بشمها ولا فينا نيبسها بقلب الكتاب.
كانت الغمرة تشفي القلب العليل والكلمة توشوش بدينتي .بحبٍك تقول ويحمروا خدودي بدون تجميل.
تفرح وتسرق بوسة من خدي ،وانا حط الوردة تحت المخدة.
ولما الليل يطل أكتبلك شعر عا دفتري .بخجل غازلك وخبي الورقة بدفترك تقراها لما تشوفها.وتغنيلي بيت عتابا ودموعي تكرج على وجهي.حنيتك بتسحرني وعلى عالم مليان حب بتوديني.
هيدي الحياة صارت من الخيال وصرنا نكتب على هالشاشة وما نعرف أذا معاني الكلمات رح توصل أو رح يتخبى المعنى بقلب الشاعر.
بردت المشاعر وصار الكلام صف حكي .مافي حرارة بالحروف.
ياخوفي يكون عم يكتب لغيري نفس الكلمات.تنزل دموعي وتعذبني الغيرة.ياترى كان أحلى حبنا قبل هالشاشة؟أو هلق صار مقبول وديلك بوسة ما فيها حرارة ولا بتشرقط النظرة متل زمان لما كنت شوفك جايي من بعيد.
يصير قلبي يدق وخاف الناس تسمع دقاتو.
خليك حدي نحكي ونضحك ونتوشوش وقلوبنا تسكر من الحب.
وبلا تلفون يقعد متل العذول بيناتنا.
أليس شوفاني أغناطيوس.
- أطول جملة في “البؤساء” للكاتب ڤيكتور هيجو - ديسمبر 23, 2025
- حوار مع الشاعرة رانيا مرعي - ديسمبر 23, 2025
- اللغة بين قلق الأكاديميين و هشاشة المستهلكين - ديسمبر 14, 2025