بقلم الشاعر هلال البعيني
شو هالشعوب ؟؟
وكيف هيك مركّبي ؟؟
من وقت نزلوا
عن كتافي ومركبي
نوح النبي …
لو شافهم كان هيك قال
وقرقش صابيعو من الندم
نوح النبي
نزلوا بأرض الحب
وبأرض الكمال
أرض القداسه والعمايم والعبي
لكن اختلفوا
تقاسموا حد المُحال
يتصالحوا
أبن العرب والأجنبي
وصورة اليوم
ورغم ما فيها جمال
بتشبه وطن
مجروح عالدمعه ربي
كل مين
عم بيشوط فيه بلا جدال
وفي قسم عم يتفرج
وعامل أبي
منشوف طابه حول منها
من الخيال
وقفت الحيّه تبتسم
للعقربي
نسيوا المآسي والفقر
والاقتتال
نسيوا شو في بهالارض ناس معذبي
يا ريت كل العمر يبقى
مونديال
والناس تنسى الانتقام المختبي
ننسى ببساطه
وقت فينا الظرف مال
ونشوف هاك الأرض طابه مذهّبي
بروح المحبه الما لها من السعر
مال
نتنافس عْلى الفوز فيها
وما تكون
قسمة الجبنه لمذهبك ولمذهبي
🙏🌹
Latest posts by Rihab Hani khattar (see all)
- أطول جملة في “البؤساء” للكاتب ڤيكتور هيجو - ديسمبر 23, 2025
- حوار مع الشاعرة رانيا مرعي - ديسمبر 23, 2025
- اللغة بين قلق الأكاديميين و هشاشة المستهلكين - ديسمبر 14, 2025