بقلم سميرة فاضل غانم
كلمات بلسان شهيد لحظة وصول الخبر لأهله:
بدخنة مسافة في حريق سكوت
رنة جرس أسود بأصبع موت
انرسمو ع فستان السما صرخات
تْطفِّي قناديل الشمس وتفوت …
فتّح عيونك يا زمن
شو خايفي يسل الحكي
وهمومنا تنزف بكي
والفجر يتكسّر على درب العلن …
غمّض عيونك يا زمن
خزق معي شعار الغياب
نشِّف قسا عروق العذاب
وكتوب عجبينك بحبر المهزلة
قصة رفاق الريح وسنين الخراب …
وإرسم عحيطان الشوارع برد
حدو حظوظ الناس قطعة نرد
طايرة معها عيون الاحتمال
يمكن فرج.. يمكن مواجع بعد …
حرر شقا الأرواح فكلّلا القمع
سكّت الشعر ذباح صابيع الشمع
عتق رؤى التاريخ بدفاتر عتب
سكر عليها منيح بي ملح الدمع…
مسَّح بدمعاتو سنديان الجريح
كرمش بإيدو ورقة الموت الصريح
فرّش ملايات اشترى قطعة سما
وكلّف رفيقو الريح يبنيلو ضريح …
نهدات عم تركض بأوقات المحن
وطرحة زفاف الأمل تتخيط كفن
وحلمنا يلي بصم فوق السكوت
قصقص جناحو وشرب نخبك يا وطن ….
- أطول جملة في “البؤساء” للكاتب ڤيكتور هيجو - ديسمبر 23, 2025
- حوار مع الشاعرة رانيا مرعي - ديسمبر 23, 2025
- اللغة بين قلق الأكاديميين و هشاشة المستهلكين - ديسمبر 14, 2025